Ante a situación que se está provocando pola venda de leite fóra de cota, coas investigacións da Audiencia Nacional en relación co caso Churtal, o Sindicato Labrego Galego quere saír en defensa dos produtores e produtoras por seren as vítimas deste proceso.

Para o Sindicato Labrego Galego existen dous responsábeis ben claros nesta cuestión: un deles é o Ministerio de Agricultura -tanto na última fase do Goberno de Felipe González, co PSOE; como despois co PP-, pois fomentou a venda de leite fóra de cota como única resposta á conflitividade social que se estaba dando pola loita dos produtores e produtoras de Galiza, que demandaban poder incrementar o seu dereito a producir. A segunda culpábel foi a Administración de Manuel Fraga en Galiza, por ser cómplice do Ministerio no fomento desta compravenda de leite fóra de cota. Así, os produtores e produtoras víronse na obriga de entregar o leite nestas condicións por non ter capacidade para decidir -aínda hoxe non poden cambiar a empresa que lles recolle a produción-; e a pesares de terse posicionado contra este tipo de prácticas, como demostraron as manifestacións e declaracións do Sindicato Labrego naquela época.

Desta maneira, as vítimas finais foron, e están sendo, as propias explotacións leiteiras e as cooperativas. Vítimas porque non se lles deixou producir o leite que precisaban para facer rendíbel a súa actividade, máxime cando as políticas
gobernamentais e comunitarias orientáronse de cara a manter os prezos artificialmente baixos; vítimas por seren criminalizadas por unha práctica fomentada dende o propio Ministerio de Agricultura en complicidade coa Xunta de Fraga; vítimas por teren pagado, un ano si e outro tamén, millonarias supertaxas por pasarse dos seus topes produtivos; e vítimas tamén por verse na obriga de malvender o leite máis barato có seu prezo de mercado, ás veces ata por 12 pesetas menos por litro.

Para o Sindicato Labrego, xa vai sendo hora de que deixen en paz a produtores e produtoras, que problemas abondo teñen nos que pensar: prezos á baixa, dificultades para ampliar a base territorial das explotacións, débedas en aumento,
supertaxas, planos leiteiros deseñados especificamente para impedir que Galiza poida producir máis, etcétera. Por iso, o SLG esixe dos responsábeis políticos, con competencias para facelo, que procuren solucionar esta problemática por outra vía
que non sexa a xudicial; e que, dunha vez por todas, o Ministerio de Agricultura comece a deseñar e aplicar políticas que apoien ás nosas explotacións e non que supoñan un obstáculo tras doutro na súa actividade.