A responsable da Dirección do Leite do Sindicato Labrego Galego, Lupe Prado, e o coordinador dos sectores gandeiros desta organización agraria, Xabier Gómez Santiso, mantiveron ayer, 3 de novembro, un encontro coa subdirectora xeral de Apoio ás Explotacións Agrarias, Patricia Ulloa, para falar sobre as causas da crise do sector leiteiro e analizar posibles solucións á mesma.

Unha das principais cuestións tratadas nesta reunión foi o estancamento dos prezos do leite na Galiza nuns valores de miseria entre os máis baixos da Unión Europea. Prado e Santiso explicáronlle a Ulloa que a tendencia á suba de prezos que leva experimentando o sector en toda a UE, con alzas de até 5 céntimos de media dende mediados de ano, na Galiza só se traduciu nunha misérrima suba de 1 céntimo; neste senso, o e a representante do SLG expresaron o seu temor de que esa cativa tendencia alcista non continúe, e mesmo se traduza en novas baixadas a partir da primavera.

A maiores, Lupe Prado e Xabier Gómez Santiso denunciaron que ese estancamento de prezos mantense nunha conxuntura na que aumentaron exponencialmente os custes de produción da actividade leiteira (electricidade, gasóleo, abonos, concentrados alimenticios, etcétera) e na que houbo factores como a seca ou os ataques da fauna salvaxe que causaron abondosas perdas extraordinarias. Neste senso, Prado e Santiso pediron que a Consellaría de Medio Rural impulse medidas que axuden a paliar as millonarias perdas que está a sufrir un sector estratéxico para a vertebración do noso medio rural coma é o lácteo.

Tamén se falou da Organización de Produtores Lácteos (OPL) para Galiza, respecto á cal, e ao contrario da Administración, Lupe Prado e Xabier Gómez Santiso amosaron a súa desconfianza con respecto a que poida chegar a ser un instrumento útil e efectivo para fixar prezos dignos para o leite