Unións Agrarias reclama do Presidente do Goberno, Mariano Rajoy que se reúna de inmediato co sector lácteo para priorizar a aplicación dos contidos normativos previstos no Paquete Lácteo -que xa conta co visto bo da Unión Europea-, para que os novos contratos homologados poidan ser aplicados desde o vindeiro 1 de abril data de comezo da campaña láctea.

Tendo en conta que a norma quedou aprobada polo Executivo saínte e despois do acordo acadado entre o Parlamento e o Consello europeo, para o sindicato non existe ningún impedimento para que o novo Goberno, poña en marcha de inmediato un regulamento fundamental para que os gandeiros poidan mellorar a súa capacidade de negociación cas industrias.

De non priorizar a entrada en vigor do decreto lácteo os produtores lácteos van ser condenados a un retraso de preto de seis meses na aplicación dunha norma que ten que axudar a erradicar as prácticas ilegais das industrias como a concertación de prezos a baixa e a imposibilidade por parte dos gandeiros de cambiar de empresa e outras que non foron investigadas polo Tribunal Galego da Competencia ata que foron denunciadas por UUAA.

Neste sentido, Unións Agrarias espera do Presidente da Xunta de Galicia, Alberto Núñez Feijoo, un compromiso real cos produtores lácteos galegos -os peor pagados de todo o Estado- e que traslade a Mariano Rajoy a urxencia de que esta norma entre en vigor. Non caben escusas tendo en conta a vontade das institucións comunitarias de sacar a diante a norma que universalice os contratos homologados para os sector lácteo.

A situación de extrema gravidade que están atravesando as economías das arredor de 11.000 familias que están ao fronte de explotacións gandeiras en Galicia, fai necesario que se acurten os prazos administrativos para que a nova normativa sexa unha realidade o antes posible e permita salvar moitos dos peches de granxas que están a punto de producirse.