O sindicato Unións Agrarias insta ao conselleiro de Economía e Industria, Javier Guerra, quen asumiu temporalmente a dirección do Instituto Galego de Promoción Económica (IGAPE) a que axilice e execute, dunha vez por todas, o aval comprometido ás empresas de primeiros compradores afectadas por CLESA. A organización sindical reitera a súa petición de solución para este problema despois de que se coñecese o auto ditado polo xulgado do Mercantil número 6 de Madrid no que aparta da xestión da compañía á familia Ruíz Mateos.

A resolución xudicial nomea, ao mesmo tempo, un equipo de administradores constituído por un letrado, un auditor e un representante da Axencia Estatal da Administración Tributaria (AEAT). Neste sentido, Unións Agrarias demanda celeridade e axilidade nas resolucións que adopte este equipo de xestión co fin de poñer fin á situación dos directamente afectados pola actividade desta empresa.

En Galicia, ademais dos 123 empregados da planta de CLESA en Caldas de Reis, unhas 300 explotacións venden o seu leite a tres empresas de primeiros compradores, que son as que precisan do aval do IGAPE para continuar coa actividade. As outras tres empresas afectadas non dependen desta subvención.

Unións Agrarias lembra que a débeda das seis empresas primeiras compradoras de CLESA en Galicia ascende a case 4 millóns de euros. Do mesmo xeito, destaca que en reunións mantidas con responsables do IGAPE, estes se comprometeron a avalar o 50% das operacións financeiras de tres empresas que optaron a estas axudas concretas: Lácteos Tambre, Lácteos Pérez e Lácteos Terra de Montes. Concretamente, o investimento autonómico podería ascender a uns 800.000 euros.

Na actualidade, o IGAPE coñece a situación real das empresas así como os datos bancarios e as sucursais nas que se están realizando as operacións financeiras, polo que non se entende o retraso nos avais comprometidos, “máxime cando neste momento, o conselleiro de Economía, na súa dobre responsabilidade de presidente e director do IGAPE, parece non quere apostar por unha solución definitiva ao problema”, segundo salientou Roberto García, secretario xeral de UUAA.