O Sindicato Labrego Galego quere expresar a preocupación diante do compromiso acadado polo Ministerio de Agricultura (MAPA) ante os representantes das diversas comunidades autónomas na aplicación da reforma da Política Agraria Común (PAC).
Para o SLG, esta reforma vai ser altamente prexudicial para Galiza, xa que contempla medidas moi nocivas para o desenvolvemento rural e a viabilidade das explotacións labregas como a baixada dos prezos agrarios de cara aos produtores e produtoras e o desacoplamento das axudas: ambas medidas suporán unha agudización do proceso de peche de explotacións, un luxo que non nos podemos permitir en Galicia despois da sangría sufrida na última década nestes senso. Ademais, estas axudas desacopladas que van dar non compensan en absoluto a caída de prezos. Para o SLG, a renda dos labregos e labregas debe vir a través dos prezos dos seus produtos e non a través das axudas.
Aclarado isto, é evidente que o SLG non agardaba nada positivo da reunión mantida entre o MAPA e as comunidades autónomas. Nembargantes, aínda que se admitiron algunhas das reivindicacións defendidas polo Sindicato Labrego, como a defensa dun acoplamento do 100% nas primas para vacas nutrices; outras medidas van supor un forte atranco para a nosa economía agraria. Vexamos algunhas delas:
• A pesares de que o SLG propuxo que se retivese un 10% das axudas para facer unha redistribución orientada a manter as explotacións labregas, nos compromisos do MAPA neste senso non se aclara cal vai ser esa porcentaxe nin os criterios que rexeran o seu reparto.
• Outro dos acordos foi o de desacoplar a produción de leite das axudas a partir do ano 2006, o cal nos parece totalmente precipitado, sobre todo se temos en conta que a reforma da PAC dá un prazo ata o 2008 para poder adaptar as nosas explotacións a este cambio tan drástico.
• O Sindicato Labrego tampouco pode estar de acordo cando se propón “a posibilidade de limitar o uso e cesión dos dereitos de axuda ao ámbito da comunidade autónoma onde se orixinaron”, xa que isto non permitiría unha redistribución deses dereitos que compensase os desequilibrios entre as distintas zonas do Estado creados pola aplicación das diversas políticas agrarias europeas anteriores; máis ben, esta medida contribuiría a consolidar eses desequilibrios.
Por todo o devandito, o SLG non só está en contra desta reforma da Política Agraria Común, que a todas luces será desastrosa para Galiza, senón que pensamos que, unha vez aceptada por imposición da Unión Europea, vaise aplicar con numerosas eivas que prexudicarán aínda máis do que podiamos prever ás nosas explotacións.
Deja un comentario