secretaria xeral do Sindicato Labrego Galego, Isabel Vilalba Seivane, participou 11 de xaneiro, na comisión de seguimento dos acordos do sector lácteo que se acadaron, a finais do ano pasado, trala folga de entregas de novembro. Na xuntanza estiveron as outras organizacións agrarias e unha comitiva da Xunta encabezada polo secretario xeral de Medio Rural e Montes, Tomás Fernández Couto, e nela traballáronse cuestións como as achegas á Lei da Cadea Alimentaria, para rematar coa posición de abuso das industrias que obrigan a vender o leite en orixe a perdas; ou a configuración dun prezo que contemple a cobertura dos custes de produción.
Isabel Vilalba destacou que, a pesares de avanzar en positivo nesta comisión de traballo, é urxente e imprescindible que o leite que se cobre neste mes de xaneiro reflicta un aumento de prezo que deteña a caída en picado nas rendas das explotacións leiteiras.
En relación tamén coa rendibilidade da profesión leiteira, a secretaria xeral do SLG chamou a atención sobre a necesidade das explotacións de ter acceso a máis base territorial para poder producir os seus propios pasteiros e forraxes de cara a diminuir a dependencia de insumos externos e baixar os custes de produción. “Para isto é fundamental”, declarou Isabel Vilalba, “a ordenación do territorio, no sentido de protexer o solo agropecuario de usos como o forestal ou o mineiro. Amais de protexer a superficie agraria, tamén son necesarios mecanismos que mobilicen a terra en desuso e abandonada para que poida ser utilizada polas explotacións agrogandeiras”.
Neste sentido, o Sindicato Labrego Galego pedirá que o solo agrario sexa destinado só a usos agropecuarios que son, precisamente, os que xeran emprego e fixan poboación de xeito permanente no medio rural. Por iso, o SLG defenderá que a nova Lei de Mellora da Estrutura Territorial Agraria de Galicia, cuxo borrador está a ser analizado e debatido nestes intres polos integrantes desta comisión, poña fin a prácticas ilicitas totalmente estendidas no noso país en conivencia coas autoridades, como a forestación ilegal de terras agrarias, que están a deixar as nosas explotacións sen predios para desenvolver a súa actividade e a converter o noso campo en materia combustible para os incendios.
Deja un comentario