O Ministerio de Agricultura vén de facer ouvidos xordos ás protestas de miles de gandeiros e gandeiras de Galiza ao converter en proxecto un plano leiteiro contra o que se manifestou a totalidade do sector no noso país. Desta maneira, a Ministra, Elena Espinosa, dálle para adiante a un sistema de reparto de cota que obriga a que o 80% dos dereitos abandonados fiquen na súa comunidade de orixe; e só o 20% vaia para a reserva con algunha posibilidade de que se reparta noutras zonas do Estado. Este sistema marxina directamente ás explotacións galegas, que representan o 55% do total que se manteñen activas a nivel estatal; e converte en foto fixa un reparto inxusto que as condena a ter que apañarse co 35% do dereitos produtivos, e a ficar a maioría por baixo da media do Estado.

O responsábel dos sectores gandeiros do SLG, Xabier Gómez Santiso, considera “ilóxico e inxusto que os dereitos abandonados polas explotacións que pechan fiquen en comunidades autónomas onde a media produtiva por explotación supera en moito á media estatal”. Santiso explica que, pola contra, “o plan debería tentar facer viábeis o máximo número de explotacións posíbeis, e para iso só hai que facer algo moi sinxelo: darlle prioridade no reparto a aquelas que non cheguen á cota media no Estado, que en Galiza son a maioría”. En efecto, no noso país hai unhas 13.100 explotacións que non chegan á media produtiva estatal, fronte a 3.000 que a superan; é dicir, o 80% das nosas explotacións sobrevive cunha cota leiteira por baixo da media.

Para a Secretaria Xeral do SLG, Lidia Senra, este plan é “completamente inaceptábel” e cualificouno de “despropósito total”. Como alternativa, Senra demanda que “se retomen os criterios do plano leiteiro do ano pasado para permitir que as pequenas e medianas explotacións con dificultades para acceder á cota poidan acadar os dereitos suficientes para manterse en activo e conservar os postos de traballo que xeran”. Neste senso, a secretaria xeral do SLG lembra que Elena Espinosa prometera que ía manter o plano leiteiro do 2005 durante toda a lexislatura; polo que, agora, a Ministra vén de faltar á súa palabra coas organizacións agrarias, dándolle as costas a todo o sector en Galiza.

Por todo o devandito, o Sindicato Labrego Galego ratifícase na súa máis firme oposición ao plano leiteiro estatal, e fai pública a súa intención de emprender as medidas de forza e mobilizacións que considere necesarias para que o Ministerio de Agricultura reconsidere a súa decisión e lexisle a favor dos intereses da maioría dos gandeiros e gandeiras para quen goberna.